مع التليفزيون

في رمضان هيحصلك كده

خلص شهر رمضان الكريم، بس بصراحة في حاجة غيظاني لازم اتكلم فيها، تليفزيون مصر العبقري الجميل معودنا دايما على إن رمضان ده غير ما خلق له .. هو شهر التسالي واللي ما يشتري يتفرج على المسلسلات والإعلانات والسهرات والمقالب و و و ..... إلخ

نمسك حاجة حاجة غيظاني ونتكلم فيها بس كل واحد يمسك أعصابه ويحطها في تلاجة.

المسلسلات، وجود الراقصة في أي مسلسل بقى حاجة مهمة وأساسية ، وبالصدفة البحتة شفت أول حلقة من مسلسل قضية رأي عام وأد أيه الملل من الرقصة المطولة بدون داعي وأقول دلوقتي هتخلص .. ملاهاش داعي أصلا .. اللهم طولك يا روح .. يا مسهل .. وفين وفين لما المخرج .. كتر خيره بصراحة .. افتكر أنه ينقل على مشهد تاتي .. وقال ايه أحنا في شهر رمضان، واستني المشهد يخلص ... لأ لازم المخرج يخلص روحنا الأول بصراحة حاجة تخنق والحمد لله انها الحلقة الوحيدة اللي شفتها.

الإعلانات بقى حكايتها حكاية .. ما انكرش إنها أصبحت مادة يمكن مشاهدتها في بعض الأحيان .. ففي بعض الإعلانات إبداع وابتكار يجذب المشاهد ويبهره .. لكن أغلبها خنيق ومستفز ومتكرر بشكل يشل .. وبالتالي التليفزيون بيصل لهدفه وهي على رأي المثل :" التكرار يعلم الـ ....." .. دا طبعا من وجهة نظرهم .. ويخرج الواحد وخاصة الأطفال حافظين الإعلانات صم وبيسمعهوها كل يوم ويغنوا معاها وهكذا وبعد كده طبعا يطالبوا أهليهم بيها .. وبتوع التليفزيون طبعا مش خسرانين حاجة .. جيوب الأبهات هي اللي هتشتكي.

البرامج الحوارية، مين ضيوفها يا ناس .. في الغالب الأعم .. الفنانين الشاملين، يعني اللي بيغنوا ويرقصوا ويمثلوا ، وطبعا الجمهور كله عارف طريقتهم في تقديم اللي بيطلقوا عليه هما "فن" .. خير اللهم اجعله خير .. ما علينا .. النوعية دي بالذات بتكتر برده في رمضان .. وبعضهم بقى بيقى على العهد واللبس ما بيتغيرش على أساس إن الدنيا حر وكده .. ومفيش مانع التخفيف في الملابس .. خلاف طريقة كلام بعضهم اللي تحس أنهم قاعدين في حارة .. والموضوعات الهايفة والتافهة موت اللي بيتكلموا فيها .. ربنا يصبرنا.

والشلل كله في برامج المقالب .. البرامج دي بالذات بتجنني .. ولازم يخرجوا الواحد فيها عن شعوره .. ومواقف في قمة البواخة اللي خلقها ربنا .. وأحيانا كتير بتوصل للضرب، ومش بيفكروا في أعصاب اللي قدامهم اللي ممكن تتحرق وهما في منتهى البرود.

مثلا في حلقة من حلقات "أديني عقلك" .. وهو فعلا برنامج جنون مفهوش ريحة العقل .. رايحين يهددوا الناس في أحد الأقاليم بهدد بيوتهم والناس تنفعل وتتضايق وتشتم وفي النهاية تبتدي المعركة بين الناس والممثلين في البرنامج ضرب حقيقي .. الغريبة انهم مش بيفكروا انه ممكن ناس تموت فيها ولا يجيلها شلل منهم ولا سكر. بجد بجد ناس خنيقة.

اللي غايظني بقى بجد .. إن كل ده مش وقته ماسورة المسلسلات والبرامج والإعلانات والمقالب مش وقتها خالص .. شهر رمضان ده للعبادة، وبما إن الكلام مش هيقدم ولا يأخر، يبقى الحل أن الناس طول رمضان متفتحش التليفزيون أحسن.

ودا مجرد اقتراح بدأت أنا في تنفيذه وكل واحد حر.

وعلي العموم كل سنة وأنتم طيبين ولله أقرب.