الوزير جــــــــــــــــــــــــــاي

فجأة وبدون مقدمات بقى الطريق اللي بمر بيه كل يوم لشغلي حاجة تانية، أيه النضافة دي وأيه الجمال ده وأيه الأشجار اللي اتزرعت فجأة دي؟

ولأول مرة في التاريخ اشوف عمال النضافة في المنطقة، يعملون بجد ونشاط، والأرض اتفرشت رملة .... أيه الحكاية الناس دي جرى لعقلها حاجة ولا أيه؟

الطريق جميل بشكل يلفت النظر .. أحنا بقينا في الزمالك ولا أيه؟ وحاولت جاهدة البحث حتى عن ورقة ... ورقة .. ملقيتش .. تصوروا.

المهم .. الناس كلها مستغربة يا ترى في أيه ؟ السواقيين يقولوا اصل المحافظ هيجي المنطقة خلال الأيام الجاية.

يا سبحان الله ، يعني مشاكلنا كلها بتنتهي بزيارة شخص منصبه كبير، والزبالة اللي كانت أكوام أكوام ومش لقين لها حل اختفت بقدرة قادر، والتراب اللي من كتره مش بتقدر تفتح عينيك سواء كنت ماشي أو راكب برده اختفى، وكل ده حل محله الرمل الأصفر والشجر الأخضر، السور اللي على طول الطريق كانت حالته يرثى لها بقى شيء تاني، الرصيف بقى أسود x أبيض، كما هو متعارف عليه دوليا.

كل يوم الطريق بيحلو عن اليوم اللي قبله، وانهارده بس عرفت ان المحافظ مش هيبقى وحده لكن كمان الوزير جاي... واليفط ملت الشوراع كل مصنع وشركة بترحب بزيارة الوزير.

من أجل الوزير مبقاش في مشاكل عند المسئولين عن الحي، بقدرة قادر مشاكل كتيرة اتحلت والدنيا بقت وردي وبمبي ومزهزهه .....

لكن ده طبعا وضع مؤقت وهينتهي بنهاية الزيارة ...

يا خوفي ناخد على الوضع الجميل ده ... ياخوفي.

لأني عارفه اللي هيحصل بعد من يمشي سعادة الوزير، كل حق هيرجع لأصحابه طبعا، الشجر هيتخلع والرمل هيتشال وهيرجعولنا الزبالة تاني والسور بقى مش عارفه هيبقى ايه محله من الإعراب، والدنيا هتبقى كحلي وبني وأي لون تاني غامق وملوش علاقة بالمبمي.

المشكلة يا جماعة إن الوزير دا في أمله كبيرة اوي في مكتبة متهنن ومفيش عنده مشاكل، ولما يفكر يمشي في طريق يتمهدله ويبقى في غاية النضافة والجمال.

هي إرف، على رأي ناس أصحابي.

نيته كويسة الوزير ده، ونية كل الوزراء والمحافظين اللي عندنا على أرض المحروسة كمان كويسة، والمشكلة الظاهر فينا أحنا.