ركب الحنطور .. واتحنطر
بجد حاجات غريبة بتسمعها ودننا اليومين دول، امبارح مثلا سمعت أغنية غريبة جدا بتقول "ركبت الحنطور .. واتحنطرت" وقعد يعيد فيها ويزيد .....
أيه بقى معني "اتحنطرت دي" مش عارفه صراحة؟؟
لو حد عارف يقولي، بقينا محتاجين دلوقتي قواميس تترجم لنا المصطلحات الغريبة اللي بقت تقتحم علينا ودانا.
فكرتني الأغنية دي بأغنية تانية سمعتها في ميكروباص وكانت بتقول كلماتها زي ما بيقولها المغني المتلوع والمتوعك بفراق أحبائه
نصحى . تناموا
ننام . تصحوا
نغرق . تإبوا
نإب . تغرقوا
وفجـأة استغرق ركاب الميكروباص في هستيريا ضحك علي هذه الأغنية العجيبة.
وفهمنا ان أحباءه مشين معاه بالعكس، بس الغريب يعني اشمعنا النوم والصحيان والغرق والأبابان يعني بالعقل كده ازاي اللي يغرق يرجع يإب ويكمل حياته عادي يعني.
على العموم الله يسامحه علي اللي بيقوله، ويرحم ودانا من التلوث السمعي اللي يجيب العته والتخلف والعبط والهبل.
3 comments:
بسم الله الرحمن الرحيم
الله يفتح عليكي يا اختي العزيزة على الخاطرة الجميلة دي.
بالطبع الأغاني دي كترة قوي قوي الأيام دول. من اول ما طلع فئة ضالة من المغنيين ولكن المشكلة الأكثر في اللي بيسموعوا الكلام ده. يعني انا حاسس ان المشكلة الأساسية في الناس، لأنهم لو احترموا انفسهم وما اشتروش هذه الاشرطة ما اعتقدش اي مغني وبعد ما يفشل شريطة الهابط انه يطلع ويتحفنا بشريط آخر. ولكن انحطاط الزوق العام (اسف على هذا المعنى) ولكن اقول ايه. اعتقد اننا بحاجة لمراجعة انفسنا فماذا حدث لنا، والى هذا الحد وصلنا؟ آسف على الإطالة.
وشكراً لأختي العزيزة الأستاذة/ هالة.
اشرف
طبعا ركبت الحنطور واتحنطرت ذي مثلا ركبت الحمار واتحمرت او ايه؟ اكيد فيه سبب للمهزلة دي...مش عارف
يرجى تصحيح كلمة كلمة يجرع الى يرجع
وشكرا
فهد
لولا ياحبيبتي دي اغنية والله ارحم كتير من أغاني تانية ،زي الاخ اللي ما بيعرفش وبيقول ومبيعملش ،على الاقل الاغنية دي لاتشير لحاجة معينة ولا بيها اي تلميحات
Post a Comment